Tiger | కొల్లాపూర్‌లో పెద్ద పులి క‌ల‌క‌లం.. ఆందోళ‌న‌లో ఎంగంప‌ల్లి తండా వాసులు

Tiger | రాష్ట్ర వ్యాప్తంగా పెద్ద పులుల సంచారం ఎక్కువైపోతోంది. ఆదిలాబాద్ నుంచి మొదలుకుంటే దిగువన ఉన్న నాగర్కర్నూల్ జిల్లా వరకు పెద్ద పులులు ఎక్కడో ఒక చోట దర్శనమిస్తూనే ఉన్నాయి. పెద్ద పులులు అడవులను దాటి జనవాసాల్లోకి ప్రవేశించి ఆందోళనకు గురి చేస్తున్నాయి. తాజాగా నాగర్కర్నూల్ జిల్లా కొల్లాపూర్ రేంజ్ సోమశిల సెక్షన్ సరిహద్దుల్లో పెద్ద పులి సంచరిస్తోంది. ఎంగంపల్లి తండాతో పాటు పరిసర ప్రాంంతాల్లో పెద్ద పులి సంచారం స్థానికులను తీవ్ర భయాందోళనలకు గురి చేస్తుంది. పెద్ద పులి కదలికలను గమనించిన తండా వాసులు జిల్లా అటవీశాఖ అధికారులకు సమాచారం అందించారు. దీంతో ఉన్నతాధికారులు డీఎఫ్వో, ఎఫ్డీవో, ఎఫ్ఆర్వో ఆదేశాల మేరకు కొల్లాపూర్ అటవీశాఖ అధికారులు రంగంలోకి దిగారు. ఎంగంపల్లి తండాతో పాటు పరిసర ప్రాంతాలను, అటవీ సరిహద్దు ప్రాంతాలను క్షుణ్ణంగా పరిశీలించారు. వ్యవసాయ పొలాల్లో కనిపించిన పులి పాదముద్రలను గుర్తించారు. అవి పెద్ద పులి పాదముద్రలే అని అటవీశాఖ అధికారులు కాశన్న, ముజీబ్ నిర్ధారించారు. పెద్దపులి సంచారం నేపథ్యంలో పర్యాటకులు, తండా వాసులు అప్రమత్తంగా ఉండాలని అధికారులు హెచ్చరించారు. వ్యవసాయ పొలాలకు ఒంటరిగా వెళ్లొద్దని, గుంపులుగా వెళ్తూ శబ్దాలు చేయాలన్నారు. ఆ అలజడికి పులి పారిపోయే అవకాశం ఉందన్నారు.