Anna Hazare | వ‌చ్చే నెల 30న అన్నా హ‌జారే నిరాహార దీక్ష‌

Anna Hazare | మహారాష్ట్ర (Maharashtra)లో సుదీర్ఘకాలంగా పెండింగ్లో ఉన్న లోకాయుక్త (Lokayukta) చట్టాన్ని అమలు చేయాలని డిమాండ్ చేస్తూ వచ్చే నెల 30న నిరాహార దీక్ష (Hunger Strike) చేపట్టనున్నట్లు ప్రముఖ సామాజిక కార్యకర్త అన్నా హజారే (Anna Hazare) వెల్లడించారు. లోకాయుక్త చట్టాన్ని అమలు చేయడంలో రాష్ట్ర ప్రభుత్వం విఫలమైందని ఆయన ఆరోపించారు. ప్రజా సంక్షేమానికి ఈ చట్టం ఎంతో ముఖ్యమని చెప్పారు. ప్రభుత్వ వైఖరికి నిరసనగా తాను నిరాహార దీక్ష చేపట్టనున్నట్లు తెలిపారు. ఇదే తన చివరి దీక్ష అవుతుందేమోనని అభిప్రాయపడ్డారు. లోకాయుక్త చట్టాన్ని అమలు చేయాలని డిమాండ్ చేస్తూ 88 ఏళ్ల హజారే 2022లో తన స్వగ్రామమైన రాలేగావ్ సిద్ధిలో నిరాహార దీక్ష చేపట్టారు. లోకాయుక్త చట్టాన్ని అమలు చేస్తామని అప్పటి ప్రభుత్వం హామీ ఇవ్వడంతో హజారే తన నిరసనను విరమించారు. చట్టాన్ని రూపొందించి, మహారాష్ట్ర ఉభయ సభలు ఆమోదించి, రాష్ట్రపతి ఆమోదం కోసం పంపాయి. కానీ ఈ చట్టం క్షేత్రస్థాయిలో ఇంకా అమలు కావడం లేదని హజారే అంటున్నారు. ఈ విషయంపై ఇప్పటికే ముఖ్యమంత్రి ఫడ్నవీస్కు తాను ఏడు లేఖలు రాసినప్పటికీ ఎలాంటి స్పందన లేదని చెప్పారు.