Mamta Banerjee | వెస్ట్ బెంగాల్‌కి దుశ్శాసనుడు వచ్చాడు..

Mamta Banerjee |వెస్ట్ బెంగాల్ ముఖ్యమంత్రి మమతా బెనర్జీ మరోసారి కేంద్ర ప్రభుత్వంపై రెచ్చిపోయారు. ప్రధాని మోదీ, కేంద్ర హోం శాఖ మంత్రి అమిత్ షాపై ప్రశ్నల వర్షం కురిపించారు. వెస్ట్ బెంగాల్లో పర్యటిస్తున్న అమిత్ షా.. వెస్ట్ బెంగాల్ ప్రభుత్వంపై, మమతా బెనర్జీపై పలు విమర్శలు చేసిన విషయం తెలిసిందే. ఈనేపథ్యంలో మమతా బెనర్జీ ఆగ్రహం వ్యక్తం చేస్తూ బీజేపీ నేతలను మహాభారతంలోని దుర్యోధన, దుశ్శాసనుడితో పోల్చారు. కోల్కతాలో జరిగిన ఓ సభలో పాల్గొన్న సీఎం.. ఈ సందర్భంగా అమిత్ షాను దుశ్శాసనుడితో పోల్చుతూ.. వెస్ట్ బెంగాల్కి దుశ్శాసనుడు వచ్చాడన్నారు. ఎన్నికలు వచ్చినప్పుడు బెంగాల్లో దుర్యోధనుడు, దుశ్శాసనుడు కనబడుతుంటారని దుయ్యబట్టారు. బోర్డర్ ఫెన్సింగ్ కోసం నేను భూమి ఇవ్వలేదట వెస్ట్ బెంగాల్లో పర్యటిస్తున్న అమిత్ షా.. నా మీద ఆరోపణలు చేస్తున్నారు. ఇక్కడికి వచ్చి పచ్చి అబద్ధాలు మాట్లాడుతున్నారు. బోర్డర్ ఫెన్సింగ్ కోసం నేను ల్యాండ్ ఇవ్వలేదట. మరి పెట్రాపోల్, అండల్లో భూమి ఇచ్చింది ఎవరు? అంటూ అమిత్ షాపై దీదీ మండిపడ్డారు. 14 ఏళ్ల క్రితం పరిస్థితి ఎలా ఉండేదో అందరికీ తెలుసు. నీటి ఎద్దడిని నిర్మూలించడానికి చాలా చేశాం. బంకురాలో ఎన్నో అభివృద్ధి పనులు చేపట్టామని అమిత్ షా ఆరోపణలను మమతా తిప్పికొట్టారు. పహల్గామ్లో ఉగ్రదాడి మీరే చేయించారా? మాట్లాడితే బెంగాల్లో అక్రమంగా వలస వచ్చే వాళ్ల వల్లనే సమస్య అంటున్నారు. ఇదే బెంగాల్ అతి పెద్ద సమస్య అంటున్నారు.. బెంగాల్ నుంచే వలసదారులు వస్తున్నారని అభాండాలు వేస్తున్నారు. మరి కశ్మీర్లో జరిగిన పహల్గామ్ ఉగ్రదాడిని మీరే చేయించారా? ఢిల్లీలో జరిగిన బాంబు పేలుడు సంగతి ఏంటి? బీజేపీ పార్టీనే అవినీతి పార్టీ. ప్రత్యేక ఓటర్ల సవరణ పేరుతో ప్రజలను పీడిస్తున్నారు.. అంటూ అమిత్ షాపై తీవ్రస్థాయిలో మమతా బెనర్జీ ఆగ్రహం వ్యక్తం చేశారు.