Bangladesh Hindu Worker Killed | బంగ్లాదేశ్‌లో మరో హిందూ యువకుడి హత్య

Bangladesh Hindu Worker Killed | బంగ్లాదేశ్లో హిందూ మైనార్టీలపై జరుగుతున్న దాడులు ఆగడం లేదు. ఇప్పటికే ఇద్దరు హిందూ యువకులను అల్లరి మూక పొట్టనపెట్టుకున్న విషయం తెలిసిందే. హిందువుల ఇళ్లపై కూడా నిరసనకారులు దాడులు చేస్తున్నారు. వాళ్ల ఇండ్లకు నిప్పు పెడుతున్నారు. అయినా కూడా బంగ్లాదేశ్ ప్రభుత్వం స్పందించడం లేదు. బంగ్లాదేశ్లో హిందువులపై దాడి చేస్తే ఊరుకునేది లేదని భారత ప్రభుత్వం కూడా బంగ్లాదేశ్ ప్రభుత్వాన్ని హెచ్చరిస్తున్నా కూడా హిందువులపై దాడులు మాత్రం ఆగడం లేదు. తాజాగా మరో హిందూ యువకుడిని హత్య చేశారు. ఈ ఘటన మైమెన్సింగ్ జిల్లాలో ఓ ఫ్యాక్టరీలో చోటు చేసుకుంది. జిల్లాలోని ఓ గార్మెంట్ ఫ్యాక్టరీలో పని చేస్తున్న 42 ఏళ్ల బజేంద్ర బిశ్వాస్ సుల్తానా స్వెటర్స్ లిమిటెడ్ అనే కంపెనీలో సెక్యూరిటీ గార్డ్గా పని చేస్తున్నాడు. అయితే.. అదే ఫ్యాక్టరీలో పనిచేస్తున్న 29 ఏళ్ల నోమన్ మియా అనే వ్యక్తి గన్తో కాల్చి చంపాడు. నోమన్ కూడా అదే ఫ్యాక్టరీలో ఇంటర్నల్ సెక్యూరిటీ ఆపరేషన్స్ విభాగంలో పని చేస్తున్నాడు. దీంతో అతడికి సెక్యూరిటీ డ్యూటీ కోసం గన్ ఇచ్చారు. ఆ గన్తోనే బజేంద్రను కాల్చి చంపాడు. ఏదో జోక్ చేస్తున్నట్టుగా బజేంద్రపై గన్ ఎక్కు పెట్టి నిజంగానే ట్రిగ్గర్ నొక్కి కాల్చాడు. వెంటనే స్పందించిన ఫ్యాక్టరీ సిబ్బంది.. బజేంద్రను ఆసుపత్రికి తరలించేలోపే మృతి చెందాడు. వెంటనే నిందితుడిని అరెస్ట్ చేశామని, బజేంద్రను చంపడానికి వినియోగించిన గన్ని కూడా సీజ్ చేశామని పోలీసులు తెలిపారు. డిసెంబర్ 18న హిందు వ్యక్తి అయిన దీపు చంద్ర దాస్ని అల్లరి మూక తీవ్రంగా కొట్టి చంపిన విషయం తెలిసిందే. ఆ తర్వాత మరో వ్యక్తిని కూడా చంపేశారు. తాజాగా బజేంద్రను పొట్టనపెట్టుకున్నారు. దీంతో ఇప్పటి వరకు బంగ్లాదేశ్లో అల్లరి మూకల దాడిలో చనిపోయిన హిందువుల సంఖ్య మూడుకి చేరుకుంది.